РУСКИ КЕРЕСТУР – Прешлей соботи, 7. априла у Велькей сали Дому култури репризно виведзена представа „Ковалє” хтору по тексту Милоша Николича виведол РНТ „Петро Ризнич Дядя”, у режиї, адаптациї и прекладу Владимира Надя Ачима.
Гоч була реприза, представу провадзело вельке число керестурскей публики хтора мала нагоди патриц убавенше и динамичнєйше виводзенє „Ковальох” як на премиєри на Драмским мемориялу.
„Ковалє”, як комедия диялоґу, а менєй ситуациї та успишни бависка зоз словами искусних Дядьових ґлумцох Емила Нярадия, Михала Варґу, Ксениї Макаї Орос и Любомира Дудаша, виволали аплаузи публики и на отвореней сцени.
Гоч комедия, „Ковалє” скривали глїбоку вецейпасмовосц и животну драму трох ковальох – Шваба, Серба и Руса, хтори у форґове войни постали нєприятельски вояки, а живот им фарсично попреплєтал судьби.