КОЦУР – Вчера, 9. марца, у полней сали Дома култури у Коцуре, отримана премиєра дзецинскей представи „Дзивчатко и жобрак” котру пририхтал Етно клуб „Одняте од забуца”.
Представу и прешвечлїву ґлуму младих ґлумцох котру по тексту Людмили Шандаловей зоз Свиднїку режирали Таня Бркич и Моника Гарди, числена публика наградзела зоз моцним аплаузом.
По законченю представи Моника Гарди каждому ґлумцови додзелєла диплому и медалю за успишно одґлумену улогу, а предсидателька Етно клуба Аранка Медєши пригодни дарунки уручела шицким котри тиж допринєсли же би представа була успишно поставена на сцену.
Дзецинска представа „Дзивчатко и жобрак” на Драмским мемориялу Петра Ризнича Дядї будзе виведзена 16. марца.