Етно-клуб означує 10-рочнїцу

автор злк
839 Опатрене

КОЦУР – Штварток, 9. марца, у Коцуре отримана перша инциятивна схадзка Предсидательства и Управного одбору Етно-клубу „Одняте од забуца” на хторей, медзи иншим, порадзене же того року будзе означена 10-рочнїца снованя Етно-клубу, а преслава будзе початком септембра.

На схадзки представени нарис програми преслави, по хторей ше планує орґанизовац вистави у Церковней сали грекокатолїцкей церки, у Етно-клубу, як и вистава малюнкох Месного одбору Рускей матки Коцур, а будзе отримана и шветочна академия у Доме култури.

На шлїдуюцу схадзку орґанох Етно-клубу буду поволани представителє шицких коцурских здруженьох з обласци култури, же би ше уключели до орґанизациї и участвованя у програми.

Члени Етно-клубу уж почню зберац експонати хтори буду и у Каталоґу Етно-клубу „Одняте од забуца”, хтори ше пририхтує, а тих  дньох почнє и велька роботна акция ярнього ушорйованя Етно-клубу и реновированє новодостатих просторийох дзияковнї.

3-Etno-02

ПОВЯЗАНИ ТЕКСТИ