НОВИ САД – На 15. Руским фестивалє малих сценских формох „Дюра Папгаргаї” всоботу вечар, 2. децембра, участвовал професийни Руски народни театер „Петро Ризнич Дядя” зоз Руского Керестура з представу „Зазбероваче труплох” на текст Звонимира Павловича, а у режиї Славка Ороса и Михайла Зазуляка, котрому з минуту цихосци одата почесц.
Представа премиєрно виведзена на тогорочним Мемориялє и охабела моцни упечаток на патрачох. У представи виприповедани 10 остатнї роки живота о. др Гавриїла Костельника, хтори ше одбуваю у воєним окруженю Другей шветовей войни, кед живот нє мал нїяку вредносц, а пре мали гришки ше трацело главу.
Представа одлично режирана, як и кадри зоз филму хтори ше швидко зменюю, а ґлуму дополнюю одлични вибор музики и филмох зоз того часу. Окреме моцни упечаток кед у єдней хвильки публика ма нагоду видзиц на филму о. Костельника и чуц його бешеду. Понеже представа у цалосци руска, од одличного тексту, по режию и ґлуму, треба ю убудовац до нашого паметаня и зохабиц нашим потомком.
