НОВИ САД – З єй представяньом у голу Покраїнскей влади пияток, 12. мая, службено почала робота Розвойней аґенциї Войводини (РАВ), а тоту нову институцию представел предсидатель Покраїнскей влади Иґор Мирович и поручел же вона єдна з ключних инструментох економского просперитету у Войводини. На представяню присуствовали госци з явного, привредного и политичного живота и дипломатского кору, як и представителє домашнїх и странских компанийох и їх дїловни здруженя.
Мирович наглашел же снованє такей аґенциї, хторей циль прицаговац домашнї и иножемни инвестициї и порушовац отверанє нових фабрикох и нових роботних местох у Войводини, часц новей економскей политики хтору ше од 2012. року успишно запровадзує у Републики Сербиї.
– Цали роботни процес Аґенциї будзе надпатрац Скупштина РАВ, хтора будзе составена з членох Покраїнскей влади, а безповратни порушуюци средства будуцим инвеститором буду додзельовац покраїнски секретарияти на основи явних конкурсох, запровадзених у складзе зоз Законом о укладаньох и правилнїком. Транспарентносц цалого процесу будзе потвердзена з порядним подношеньом звитох Скупштини Войводини, а у цесней координациї з Розвойну аґенцию Сербиї, Владу Сербиї и одвичательнима републичнима орґанами и институциями – гварел Мирович.
Мирович гварел же перши средства за РАВ, коло 400 милиони динари, буду обезпечени з ребаланс покраїнского буджету у юнию, а у буджету АПВ за 2018. рок буду значно векши, та и простор за роботу РАВ будзе у полним капацитету и вельо ширши.
Директорка РАВ Наташа Павичевич Баїч, зоз сотруднїками, представела функционованє Аґенциї през штири сектори – Сектор за стратеґийни виглєдованя, розвой и иновацийну политику, Сектор за потримовку инвестицийом, Сектор за медзинародни и домашнї фонди у функциї розвою Войводини и Сектор за промоцию.
