Источашнє ше єй удава виполнїц полни роботни час на двох або трох роботох у медицини, потим ше усовершує, школує за висши уровень того фаху, путує по Америки, сцигнє ше виспац, та и дружиц зоз єй милима особами. Поряднє вола 97-рочну бабу у Керестуре, цо и єдна з причинох за єй приходи до родного валалу.
Особа од котрей ше вельо обчековало, а шицко з причину бо вше була за приклад. Вихована у обисцу полним злагоди, любови, порозуменя и воспитованя з цильом потримац прави вредносци… Була дзивка єдинїца, як Оливера толкує, праве прето можебуц єй родичи були строгши, а од нєй обчековали же би була самостойна и порихтана робиц шицко. Мац ю одмаючка научела робиц по обисцу, у Керестуре копала и садзела заградку зоз квецом, помагала коло загради, знаходзела ше у кухнї, а попри шицкого була добра школярка котра окреме любела обласц медицини.
− У Сербиї сом закончела штредню Медицинску школу за физиотерапеутского технїчара, а вец сом ше уписала на медицински факултет. Нє закончела сом, гоч ми лєм дакус хибело по конєц. Нажаль, у тим периодзе ми умарла мац, та сом ше нє знашла и нє знала сом цо робиц зоз собу. На хвильку сом застала и ришела же пойдзем оталь. Оддавна сом мала план за одход споза гранїци тей держави, нє пренаходзела сом ше ту, а цо ше дотика мойого фаху, я ше вше видзела у напреднєйшим и розвитшим штредку − толкує Оливера.
Же єй иножемство и робота у других штредкох лєм нови искуства у шицких сферох живота, шведочи єй приповедка о способе як ше знашла у цудзини. Подобнє як и вона, так и єй родичи єдну часц живота препровадзели у иножемстве, оцец на дочасовей роботи у Нємецкей, а мацери перша робота була у Босни, єден период робела у Кули у Центру за социялну роботу, а пензию дочекала у рускокерестурскей школи як педаґоґ, учителька у специялним оддзелєню.
ОЗНОВА ОД ПОЧАТКУ
− Перши мойо роботи у Канади були цалком обични и нє мали вязи зоз медицину. Нє бул ми проблем робиц инше, алє сом пожадла превериц саму себе, а мала сом и вельке жаданє помагац другим. Нє удало ше ми нострификовац диплому штреднєй школи, а анї положени испити з Медицинского факултету у Новим Садзе ми нє припознали. Но, после того, моя одлука була дефинитивна же ше опробуєм школовац, вшелїяк же сом зоз анґлийским язиком овладала ище у Сербиї, а векшину испитох котри були предо мну, я уж раз покладала, лєм же на сербским язику − гвари наша собешеднїца. Тераз єй найблїзши анґлийски язик, так роздумує, а кед приповеда по руски, та себе у глави преклада. Причина за тото то же у Канади жиє у штредку дзе нєт Руснацох, вельо путує, а час на роботи препровадзує з колеґами рижних националносцох.
Як физиотерапеут почала робиц после законченого курсу у Канади, попри роботи предлужела школованє за перши спомедзи трох уровньох школи за медицинску шестру. Намагала ше робиц на вецей роботних местох, з чим збогацовала свою роботну биоґрафию, цо єй приношело лєм позитивне, дзекуюци чому лєгчейше достава стипендиї за свойо школованє. Тераз сцигла по закончени други уровень, а уж планує же дзе предлужи свойо образованє за „nurs practicioner” цо поровнуюци зоз нашу систему исте цо и дохтор общей пракси котри препатра пациєнтох и преписує терапию.
− Находзим ше у бази медицинских роботнїкох и у системи занятосци на кратки период у вецей институцийох, та плануєм пойсц до Америки дзе ше предлужим далєй школовац, а шицко тото може лєм збогациц мою биоґрафию. За мнє нє постої нїяка друга робота, тото любим и то мой живот. Нє меняла бим ю нї зач и нє плануєм од школованя одустац. Любим шпиталь и помагац хорим. Видзела сом же ми школованє идзе, а после медицинского факултету то за мнє було як „peace of cake” − дознаваме од Гардийовей. Попри шицкого, програма на телевизиї ю нє прицагує, а любовни романи заменєла зоз фахову литературу.
ДЗЕКУЮЦИ ВЛАСНОМУ ТРУДУ
− Школованє у Канади драге и нє за кажду кишенку, алє зоз трудом мож посцигнуц вельо. Постоя рижни можлївосци же бим мала стипендию, так же ше знаходзим и у тей сфери. Стипендиї доставам дзекуюци добрим оценом, котри понад просеку. Єст ище єден способ за доставанє стипендийох, а то спорт, но, я ше нє барз знаходзим у тей обласци.
СЦИГНЄ И ПУТОВАЦ
Оливера и нєшка чежко подноши лєценє на авиону, алє заш лєм часто путує. Як туриста путує и на авту, нє проблем єй до ньго шеднуц гоч кеди, а люби и кед є у дружтве єй милих особох и новоздобутих товаришох, колеґох и приятельох, понеже Канада наисце мултикултурална жем у котрей шицки єднаки.
− Потераз сом обишла векшу часц восточного-америцкого побрежя, нащивела сом Ню Йорк, Чикаґо, Иланоис, Кентаки, Вашинґтон, Маями и велї менши места, а же бим ше шицкого здогадла мушела бим поопатрац слики. Часто ше врацам на Флориду и єй побрежя, єдноставно, любим морйо. У Вашинґтону сом обишла предсидательску резиденцию – Билу хижу, нажаль тот будинок мож опатриц лєм здалєка, нє мож присц анї кус блїзко, так як цо ю приказую на телевизиї. Часто ше врацам до Дизниленду у Орланду на Флориди, и вон на мнє вше охаби моцни упечаток. Ню Йорк дефинитивно нє за мнє, там велька гужва, цалком процивне од мирней Канади. Любим Панама Сити Бич, там кажди даскельо мешаци одходзим на морйо, окреме кед у Канади жима − приповеда Оливера, и уж планує дзе пойдзе и цо нащиви на драги по свой канадски дом. Кед приповедка о доме, вона гвари же ма два доми, у Канади и у Руским Керестуре, а же єй дом, у ствари, у куфре. Нє вяже ю место, а заш лєм, чи приходзи тадзи чи оталь одходзи, вона вше гвари же идзе дому.
НАЙБАРЖЕЙ ШЕ ЄЙ ОБРАДУЄ БАБА
У валалє єй жиє баба, Ирина Сабадошова, мацерова мац, котра ю найбаржей чека и котра жиє за кажде стретнуце з унуку.
− Моя 97-рочна баба ше ище вше сама о себе стара. Тераз єй уж помага єдна жена, алє ище вше сама плєє квеце у заградки. Кед я придзем, та ше прешейтаме, вона ше щиро шмеє и радує. Зоз бабу пошедзим на драже, зоз сушедами, як цо то дакеди бул обичай − гвари Оливера. Можебуц рецепт за бабову длуговичносц праве у єй способе живота, баба кажди дзень пиє чай, вєдно зоз унуку наоберали руменцу, а зоз андю котра єй вше на помоци, порихтали лїпов чай за цали рок. Розход зоз бабу найчежши, алє ту и плани за идуци приход, понеже Оливера кажди рок нащивює свой валал.
У валалє ма и числену родзину, гоч єй мац була єдинїца, оцец єй бул єден спомедзи дзевецерих дзецох, так же вона дзеветнаста од двацецерих уначатох баби и дїда Гардийових. Дзекуюци велькому роду, гоч єй родичи Мария и Янко покойни, вше ю у валалє єст хто привитац и дочекац, а то ширша фамелия з котру ше кажди рок зиду голєм на полудзенку.