ЗЕМПЛИНСКА ТЕПЛИЦА – Представнїки Совиту Месней заєднїци Руски Керестур, Националного совиту Руснацох, Дому култури Руски Керестур, як и Фодбалского клубу „Русин” од 8. по 10. юний госцовали у Земплинскей Теплици у Словацкей, з нагоди преслави 755- рочнїци того валалу, а на основи спорозуменя о сотруднїцтве медзи Руским Керестуром и Земплинску Теплицу, котре подписане прешлого року под час Фестивала рускей култури „Червена ружа”.
Спред Совиту Месней заєднїци Руски Керестур були його члени Тихомир Фейди и Дюра Планчак, як и Желько Ковач, котри тиж так бул и як предсидатель Вивершного одбору Националного совиту Руснацох. Внєдзелю, 10. юния, мали шветочни приєм у уряду, дзе их привитала старостка того места Йозефина Угальова, а бешедовали о преширйованю сотруднїцтва медзи тима двома валалами.
Всоботу, 9. юния, отримане ревиялне змаганє медзи ФК „Русин” и ФК „Земплинска Теплица”, у хторим Керестурци победзели домашнїх зоз 7:1.
Члени Дома култури Руски Керестур представели ше внєдзелю, 10. юния, на културно-уметнїцкей програми, на хторей наступели и домашнї з Културного дому „Тепличан”, як и госцуюци ансамбл „Варґовчан” зоз Словацкей.
Солистка Саня Чапко виведла даскельо руски шпиванки, Оркестер ше тиж так представел з даскельома композициями, а провадзел и Виводзацки фолклорни ансамбл, котри одтанцовал штири хореоґрафиї.