ВЕРБАС – У ресторану „Ловац” у Вербаше пондзелок у предполадньових годзинох ше позберало вельке число гражданох и симпатизерох Сербскей напредней странки же би дочекали Александра Вучича, бувшого предсидателя Републики Сербиї, и ношителя лїстини „Александар Вучич – Уєдинєна Сербия”.
Присутни го дочекали зоз гласним аплаузом, а потим и гуторел даскельо слова. Визначел инфраструктурни потреби вербаскей општини, окреме видвоєл канализацию, водовод, а спомнул и потребу ушорйованя драгох и улїчкох котри гражданє каждодньово хасную. Нови укладаня, приход инвеститорох и отверанє нових роботних местох були медзи главнима темами бешеди.
Вучич тиж подзековал шицким котри го потримую на витирвалосци предходни рок и пол до два понеже, як гварел, жительом тей часци Южнобачкого округу було чежко. Вихасновал нагоду визначиц политични и дружтвени подзелєня, а по його словох, исновали пробованя знїщованя традицийних вредносцох и губеня фамелийних одношеньох котри, як додал, були унапрямени на творенє роздору медзи ґенерациями и виволованю зраженьох.
Прешвечени до побиди на наиходзацих виберанкох, Вучич на концу гварел же його политични процивнїки поступно траца потримовку, а шицким котри го потримую поручел же би остали присебни и нє нашедали на провокациї. Окрем Вучича, на сходу бул и предсидатель Сербскей напредней странки Милош Вучевич.
Сход бул провадзени зоз музику тамбурового оркестру „Звуци равнице”, ловарским котлїком котри рихтали вербаски ловаре и другима специялитетами, а простор бул виполнєни зоз столами коло котрих присутни уживали у єдзеню, пицу и друженю.
