НОВИ САД – У найновшим, 41 чишлє новинох „Руске слово” у рубрики Анатомия нашого часу Михайло Катона пише о тим цо предпоставя же ше случи после парламентарних виберанкох хтори буду 25. октобра. На Тижньовнїку текст o наиходзацих парламентарних виберанкох и виберанкох за национални совити националних меншинох хтори буду отримани 8. новембра.
Рубрика Нашо места пише о Шветовей ради Русинох/Руснацох/Лемкох хтора отримана прешлого викенду у Старих Янковцох. У Руским Керестуре отримана дводньова „Керестур опен” журка. У Коцуре, Керестуре, Ґосподїнцох огньогасци апелую на одвичательносц зоз палєньом на польох. У Вербаше у предвиберанковей кампанї бул Александар Вучич и представел лїстину Сербскей напредней странки, а тиж у тим варошу бул и др Илия Срданович хтори отримал трибину „Студентскей лїстини”. У Печинцох тройо Руснаци були на семинаре за режисерох. Ту и текст же часц „Ошмиху Войводини” прейдзе и през Руски Керестур.
Боки Економиї пишу о продукциї цибулї у дюрдьовским хотаре, же цена нїзка и же ю буду предавац на жиму. На бокох култура и просвита текст о Манифестациї „Кед голубица лєцела” хтора отримана у Петровцох, о вистави Силвестера Макая у Вербаше, предлуженим пребуваню у керестурскей школи.
На бокох Людзе, роки, живот стретнуце зоз Наталу Киш зоз Нового Орахова. На бокох Духовни живот тексти о нєзаповеданим швету Покорову Богородици хторе преславене у Водици, и о дзецинских стретнуцох пиятками у керестурским Каритасу. Ту и репортажа зоз паломнїцтва до Сиверней Македониї, хторе орґанизовала Културна рада новосадскей парохиї св. апостолох Петра и Павла зоз парохом о. Дарком Рацом.
На Спорту висти о змаганьох, побидох и пораженьох фодбалерох, рукометашох, каратистох, столнотенисрох, а и о 35. Спортских бавискох „Яша Баков” – мали фодбал за ветеранох, хтори отримани у Новим Орахове. На бокох Дружтво 14. предлуженє вибору зоз кнїжки о. Владимира Еделинския Миколки „Як гуторя дїдове, швет бул давно иншаки”.
Додатки у тим чишлє Мозаїк и Руснаци у швеце, на Горуцих тепшох нови рецепт.