ДЮРДЬОВ – Руски народни театер (РНТ) „Петро Ризнич Дядя” зоз представу „Ковалє”, всоботу 5. мая, наступел у Културно-уметнїцким дружтве „Тарас Шевченко” у Дюрдьове.
Штирочлена ґлумецка екипа представу першираз одбавела звонка Руского Керестура и обрадовала домашню публику. Представа ма характер комедиї, та ше домашнї крашнє нашмеяли, бо ґлумци добре пренєсли праве замишательство комичних ситуацийох, односно замишательство родзинских вязох послевойнового периоду медзи Нємцом, Сербом и Русом. Представу режирал Владимир Надь Ачим, а текст Милоша Николича преложел и прилагодзел керестурским ґлумцом. Представа „Ковалє” премиєрно виведзена на 50. Драмским мемориялу „Петро Ризнич Дядя”.
На госцованю у Дюрдьове бул и Славко Орос, директор РНТ „Петро Ризнич Дядя” з Руского Керестура, котри гварел же ше буду намагац же би тота представа госцовала у цо вецей наших местох.