НОВИ САД – На вовторок 15. мая, будзе отворени 85. Медзинародни польопривредни саям у Новим Садзе и будзе тирвац по 21. май.
На конференциї за новинарох отриманей у Шветочним салону на Новосадским сайму гварене же ше того року приявели скоро 1 500 викладателє зоз 60 державох, а перши раз участвує и держава зоз африцкого континента – Тунис, хтора будзе мац националну виставу.
Держава приятель Французка, а Саям означи национална вистава статку, вистава польопривредней механїзациї, вистава поживи и продуктох зоз ознаку ґеоґрафского походзеня, вецей фахово сходи у Конґресним центре, а нащивителє зоз уходнїцу можу участвовац у наградним бависку. Того року буду три награди – два трактори „беларус 622” и „john deere 5045 wd”, як и рото фреза „hisarlar”.
Капури Сайма буду отворени на вовторок, 15. мая, од 9 годзин, а святочне отверанє заказане на 13 годзин. Нащивителє годни присц и кажди дзень од 9 до 19 годзин.
Цена поєдинєчней уходнїци 600 динари, колективней 400, док за пензионерох и дзеци од 7 до 12 роки, як и за колективни нащиви школярох и студентох, уходнїца 200 динари.
Пияток, 18. май, будзе фамелийни дзень и родичи зоз дзецми до 16 роки можу войсц зоз єдну купену уходнїцу.
