Наиходзацого викенду „Днї керестурскей паприґи”

автор мар
1.2k Опатрене

РУСКИ КЕРЕСТУР – Того викенду, 19. и 20 авґуста, у Руским Керестуре будзе отримана Туристично-привредно-културна манифестация „Днї керестурскей паприґи” у орґанизациї Здруженя паприґарох „Капсикум анум” и Конїцкого клубу „Русин”.

Манифестация почнє соботу на 11 годзин на оглядним полю у Чизмарових, а потим заплановани полудзенок за госцох и одкупйовачох, та знова одход на даскельо поля членох Здруженя.

„Днї керестурскей паприґи” урядово буду отворени на 17,30 годзин у центре валалу, дзе на числених штандох, домашнїм и госцом буду представени плоди паприґи, продукти з паприґи и друга желєнява котру ше продукує у Керестуре, та нашенково, хемийни и осиґуруюци хижи.

Под час културно-уметнїцкей програми будзе и дефиле парадних запрагох и дзецински маскенбал. Як и вше потераз, годно ше наєсц, понеже домашнї буду вариц и традицийни єдла, у 15 котлох.

Нєдзельова часц Манифестациї започнє ма 14 годзин на Гиподроме „Леї”, з єднозапрагнима дринґацкима обегованями запрагох, будзе и вистава паприґи, продуктох з нєй и рижней другей желєняви, як и ревиялне двозапрагне дринґацке обегованє коньох, и рижни змисти за розвагу.

Отримованє Манифестациї потримали Покраїнски секретарият за польопривреду, водопривреду и лєсарство и Општина Кула.

ПОВЯЗАНИ ТЕКСТИ