На Дню школи и удатни Саям науки

автор мар
1k Опатрене

РУСКИ КЕРЕСТУР – Означованє Дня Основней и штреднєй школи з домом школярох „Петро Кузмяк” вчера почало зоз Саймом науки, хтори за своїх парнякох од першей по осму класу пририхтали старши основношколци и штредньошколци, з наставнїками и професорами. Представени „скрити бок” природи и науки, можлївосци, експерименти и практичне хаснованє хемиї, биолоґиї, ґеоґрафиї, физики и математики.

Хемию заєднїцки представели школяре основней и штреднєй школи, биолоґия приказана на двох штандох – єден з експонатом терариюму виєтнамских пальчочкох, а други, хтори пририхтали штредньошколци, бул фокусировани на чловекову анатомию и патренє през микроскоп.

На штанду математики презентована обласц Платонових целох, судоку-числа, тродимензийни цела, складанє рубиковей коцки и танґрамох, та и можлївосц паметаня велького числа децималох. У кабинету физики приказани рижни експерименти хтори потвердзели физични закони и основни параметри густосци, прициску и друге.

При каждим штанду була велька гужва и интересованє школярох и наставнїкох за викладане и презентоване, цо потвердзенє же то бул прави поцаг орґанизаторох Сайму науки у рамикох Дня школи.

 

 

ПОВЯЗАНИ ТЕКСТИ