ЖАБЕЛЬ – Гражданє Општини Жабель котри ше процивя будованю комплексу за рециклажу пнеуматикох у жабельским хотаре, пре заґадзованє животного простору и нєпочитованє правилох єй будованя, на нєдзелю, 26. юлия орґанизую протестне шейтанє.
Сход будзе на 19 годзин у парку опрез основней школи у Жаблю. После того будзе протестне шейтанє по локацию на котрей плановане будованє построєня за рециклажу одпадних ґумох и продукцию продуктох зоз ґумових ґранулатох.
Орґанизаторе протесту, любителє природи и почитователє еколоґиї и животного штредку назначели же нє жадаю же би на тим протесту було студентски, або политични назначеня, бо протест орґанизую жителє котри нє жадаю жиц у заґадзеним животним штредку.
Здогаднїме, 15. априла отримана явна презентация урбанистичного проєкту урбанистично-архитектонского розробку локациї 7499/4 КО Жабель за потреби реконструкциї иснуюцого обєкту зоз надбудову, адаптацию и пренамену комплексу за рециклажу пнеуматикох. На Явней презентациї було вельо заинтересованих гражданох котри ше найвецей випитовали о защити еколоґийней системи, яки мири коло того превжати, алє и чи єст параметри котри годно поровнац, та и доказац як уплївую на еколоґийну систему. Пошвидко после тей розправи, опрез будинка Општини Жабель орґанизовани еко-сход на котрим компетентни особи явно гуторели прецо би ше гражданє требали вибориц же би ше нє будовало тото построєнє. Теди процив будованя комплексу за рециклажу пнеуматикох у жабельским хотаре бешедовали лїкар специялиста патолоґ и бувши директор Пастерового заводу у Новим Садзе Душан Лалошевич, директор Еколоґийного руху Нового Саду Никола Алексич и дипломовани правнїк, предсидатель Еколоґиного руху Сербиї и Еколоґийного руху Нового Саду Остоя Дражич.