ЯСИНЯ (УКРАЇНА) – У месце Ясиня, у Закарпатскей обласци України, од 3. до 6. мая, отримани III Медзинародни фестивал „Гуцулска родзина 2018” котри орґанизовала Гражданска орґанизация „Гуцул и Компания” з Ужгороду.
Фестивал отворени 3. мая у подножю гори Говерлї, нєдалєко од жимского ски-центру Буковель кед у святочней програми привитани шицки госци.
На Фестивалу участвовали коло 60 ґрупи, углавним з України, як и три ґрупи з Билорусиї. Фестивал бул подзелєни на театралну, вокалну, акробатску и фолклорну часц. Ґала концерт отимани 6. мая коло рики Чарна Тиса на котрим наступели познати уметнїки – шпивач Иван Попович и гушляр Олег Кульчицки. Приказана богата програма, а найвекши упечаток охабело ориґиналне гуцулске облєчиво и инструменти.
Под час Фестивала шицки учашнїки обишли локални музей и стару древену церкву, а потим були госци туристичней бази Буковель.
На Фестивалу були присутни и представнїки рижних гражданских орґанизацийох зоз Сербиї, Словацкей, Румуниї и Мадярскей.
На концу програми подписана Догварка о медзисобним сотруднїцтве Гражданскей орґанизациї „Гуцул и компания” и Союзу Руснацох Українцох Сербиї по котрим предвидзене сотруднїцтво у обласци култури, науки, медзисобне информованє о акцийох и черанє програмох културно-уметнїцких и других дружтвох. З боку Гражданскей орґанизациї догварку подписал предсидатель Василь Клочуряк, а з боку Союзу Боґдан Виславски. З представнїками ансамблох присутних на Фестивалу догваряло ше о можлївим сотруднїцтве.
Источашнє, достате и понукнуце Союзу уметнїкох України, прейґ їх заступнїка Ивана Поповича, же би ше и з нїма подписало Догварку о сотруднїцтве.
