РУСКИ КЕРЕСТУР – Вчера, 22. октобра, з нагоди Дня ошлєбодзеня Руского Керестура у Другей шветовей войни, домшнє Здруженє спортских рибарох (ЗСР) „Коляк” орґанизовало традицийне змаганє у лапаню риби „Чукияду”. Участвовали аж трицецштирме рибаре з Керестура, Кули, Лалитю, Вербасу и Крущичу, а медзи нїма були пейцме пионире.
У катеґориї пионирох перше место освоєл Стефан Варґа, котри влапел чуку чежини 790 ґрами, друге место зоз 600 ґрами улову припадло Борисови Жирошови, а треце место подзелєли троме пионире котри остали без улову на вчерайшим змаганю.
У конкуренциї сениорох перше место завжал Зоран Йованович з влапенима штирома чуками, вкупней чежини 2110 ґрами, друге место Мирон Лазор з тиж штирома чуками, чежини 2095 ґрами, док треце место освоєл Янко Фекете, чий улов бул 1905 ґрами.
За шицких учашнїкох и своїх членох ЗСР „Коляк” по законченю штирогодзинового змаганя орґанизовал полудзенок и друженє, а сениоре достали пенєжни награди – за перше место 6 000 динари, друге 4 000, а за треце 2 000 динари. Пионире достали опрему за лапанє риби, а шицки пионире-учашнїки и символични дарунки за участвованє.
Змаганє отримане на часци беґелю поза брану, ґу крущицкому мосту.
