На пияток у Коцуре почина „Едукация младих Руснацох”

автор злк
821 Опатрене

КОЦУР – На пияток, 10. авґуста, у Коцуре почина волонтерска акция „Едукация младих Руснацох” котру орґанизує Коцурске здруженє младих „КУМ”.

На акцию ше приявело 40 младих зоз шицких наших местох, алє и зоз Беоґраду, Шабцу, Нишу, Бєлїни и Любляни.

У рамикох дакедишнєй Акциї „Дай и ти свою руку” Коцурске здруженє младих у авґусту орґанизує едукацию на котрей млади през рижни тренинґи буду учиц як ше пише проєкти, а през рекреацию ше буду дружиц и медзисобно упознавац, а обиду и Коцур и на соботу пойду на гуманитарни рок концерт до Вербасу.

На едукацию приду и млади зоз Словениї и Босни и Герцеґовини котри до Сербиї приходза прейґ програми „Ерасмус плус” и буду у Сербиї, а шицки учашнїки буду змесцени у просторийох Каритасу и на Пелетовим салашу.

Програма акциї почина пияток на 18 годзин, кед опрез Каритасу будзе дочекованє учашнїкох. Истого дня после вечери будзе орґанизованє друженє у Етно клубу „Одняте од забуца”. На соботу, после фриштику, єдна ґрупа котра будзе змесцена у Каритасу будзе присуствовац едукациї, а волонтере буду робиц у роботней акциї Потим волонтере маю орґанизовани одход на базен до Вербасу, а од 22 годзин и на гуманитарни концерт. На нєдзелю волонтере котри пришли зоз наших местох годни пойсц на богослуженє до грекокатолїцкей, римокатолїцкей або православней церкви, а акция ше закончи после полудзенку.

Волонтере котри приду прейґ програми „Ерасмус плус” после полудзенку орґанизовано обиду Нови Сад.

ПОВЯЗАНИ ТЕКСТИ