ВЕРБАС – На 11. схадзки локалного парламенту у Вербаше стреду 13. юния розпатрани и 23 точки дньового шора, прилапени вецей одлуки, а медзи нїма и Одлука о правох на финансийну потримовку фамелийом з дзецми, як и Одлука о обезпечованю услуги зогриваня за сезону 2018/2019. рок.
Тиж так, прилапени звити о роботи Народней библиотеки „Данило Киш”, Културного центру Вербас, Центру за физичну културу, Дома здравя, Апатики „Вербас”, Центру за социялну роботу, Ґеронтолоґийного центру Вербас и Туристичней орґанизациї Вербас за 2017. рок.
Одборнїки прилапели и порядни рочни финансийни звити и ликвидацийни звити за 2017. рок за два подприємства у ликвидациї – Явне подприємство за информованє „Вербас” и Явне подприємство „Дирекция за вибудов”.
Прилапене и Ришенє о даваню согласносци на Одлуку о вименкох Статуту Центра за физичну културу „Драґо Йовович”, хтора ше одноши на нови Каталог роботних местох при хасновательох явних средствох.
На предклад Комисиї за кадрово, административни питаня и роботни одношеня, розришени стари и меновани нови школских одбори на мандат од штири роки у осем основних школох у Вербаше и валалох општини, у Музичней школи и Штреднєй фаховей школи „4. юлий”, Управни и Надаптарюци одбор Дома здравя „ Велько Влахович”.