НОВИ САД – Фестивал новей рускей народней шпиванки „Ружова заградка” будзе отримани у Студию „М” на ютре, 4. марца, а обезпечене и директне радийске и ТВ преношенє у рамикох термина „ТВ Маґазина” и „Широкого плану”.
На Фестивалє буду виведзени 16 нови композициї у народним духу, хтори вибрани од 26 композицийох цо сцигли на конкурс. Шпивачох будзе провадзиц Вельки народни оркестер Радия Нового Саду под руководством маестра Мичи Янковича. Музични редакторки Фестивала Агнета Тимко Мудри и Татяна Колєсар Ґвоїч, а шпивачох будзе провадзиц Студийска провадзаца ґрупа. Наступя углавним солисти и єден дует, а того року, понеже Фестивал змагательного характера, додзеля ше и пейц награди: перше, друге и треце место за композицию, потим награда за аранжман, интерпретацию и текст, як и стаємна награда публики.
Оценьовац и виберац будзе фахови жири у составе Олена Пушкаш, Лїляна Барна Никитович, Снежана Євтич Янюшевич за музични нумери и Олена Планчак-Сакач за текст шпиванки.
Виставу, котра почнє на 19,30 годзин, за тоту нагоду пририхтує Олґа Карлаварис, а представи ше млада малярка зоз Суботици Андрея Палатинус, котра тераз жиє и роби у Паризу. Єй роботи були виложени и на вистави у Суботици з нагоди нашого Националного швета Руснацох. Уж порихтани и провадзаци материял як цо то поволанки, каталоґ за виставу, гласацки лїстки, у цеку и знїманє КД зоз новима шпиванками.
Ревиялна часц тогорочней „Ружовей заградки” будзе пошвецена текстописательови Михайлови Зазулякови, хтори роками посилал свойо стихи за композициї на тот Фестивал, а хтори ше упокоєл прешлого року пре хороту.
Шицки котри любя руску музику поволани присц до новосадского Студия „М” на 20 годзин, а годни и гласац за шпиванку котра ше им будзе найбаржей пачиц.