На ютре почина Швето култури „Свиднїк 2017”

автор зам
950 Опатрене

СВИДНЇК (СЛОВАЦКА) – У Свиднїку на ютре, 16. юния, почина 63. Швето култури Русинох-Українцох Словацкей „Свиднїк 2017”, а тирва по нєдзелю, 18. юния.

Попри домашїх музично-танєчних ансамблох, медзи нїма и ПУНИ з Прешова, на фестивалє того року участвую ансамбли и солисти України, Литви и зоз Сербиї.

З нашей жеми на програмох Швета култури наступи соло-шпивачка Ана Римар з Петроварадину, а госци фестивалу буду и представителє Союзу Руснацох Українцох Сербиї, на чолє з його предсидательом Боґданом Виславскийом.

Попри наступу дзецинских и музично-танєчних ансамблох на сцени амфитеатру у Свиднїку, у рамикох фестивалу будзе и вистава подобових роботох Василя и Петра Свалявчика, вистава скулптурох з древа у сканзену, а з окремнима програмами Фолклорни ансамбл „Маковица” зоз Свиднїку означи 60-рочнїцу роботи, а його „Маковичка” 20-рочнїцу.   

Швето култури орґанизую Союз Русинох-Українцох Словацкей, Прешовски самоуправни край и Музей українскей култури Словацкого народного музею, под покровительством предсидателя Влади Словацкей Републики Роберта Фицу и предсидателя Прешовского самоуправного краю Петра Худїка.

ПОВЯЗАНИ ТЕКСТИ