БЕОҐРАД – Покладанє закончуюцого испиту за школярох осмих класох ОШ почина нєшка, 14. юния и тирва три днї, а шицки школяре муша покладац малу матуру, хтора представя службене законченє основношколского образованя. Зависно од числа бодох освоєних на тих тестох и успиху у основней школи, школяре буду ранґовани за упис до штреднєй школи.
Тест зоз сербского, односно мацеринского язика школяре покладаю нєшка, на ютре покладаю тест з математики, док комбиновани тест з биолоґиї, хемиї, физики, историї и ґеоґрафиї буду покладац на пияток, 16. юния.
На каждим з трох тестох школяре максимално можу достац по 10 боди, хтори ше здава з бодами на основи успиху на концу шестей, седмей и осмей класи и творя основу за ранґованє за упис до штреднєй школи.
Прелиминарни резултати закончуюцого испиту школи обявя 18. юния, потим шлїдзи час за жалби школярох, так же конєчни резултати буду обявени 23. юния.
По обявйованю конєчних резултатох на шоре придаванє лїстини жаданьох за упис до штреднїх школох, а розпорядок упису школярох до школох будзе обявени 3. юлия, док 4. и 5. юлия будзе и сам упис до штреднїх школох.
Того року 127 школи уписую школярох до дуалного моделу образованя, односно ученя през роботу. До 49 школох у Сербиї уведзени 19 нови образовни профили, док 43 профили з елементами дуалносци ускладзени з тарґовищом роботи у ище 78 школох.
Други уписни круг за кандидатох котри нє буду уписани у першим кругу почина 7. юлия, кеди ше придава лїстину жаданьох.