ВОЙВОДИНА – Упис до першей класи основней школи за школски 2017/18. рок у Войводини урядово почина нєшка, 1. априла, но понеже нєшка собота, школи прияви за упис буду примац од пондзелку 3 априла, сообщене з Покраїнского секретарияту за образованє, предписаня, управу и национални меншини-национални заєднїци. Упис тирва до 31 мая, медзитим до першей класи дзецко годно уписац и после того датуму.
До першей класи ОШ ше уписує дзеци народзени од 1. марца 2010. року по 28 фебруар 2011. року. До школи ше можу уписац и дзеци котри од 1. септембра 2017. року полня шейсц и пол роки, з обовязним преверйованьом їх порихтаносци за рушанє до школи, як и дзеци старши од седем и пол роки, котри ше пре даяки оправдани причини нє могли скорей уписац до школи. На вимогу родичох, школа длужна, у складзе зоз своїма можлївосцами, уписац кажде дзецко з подруча школи и з подруча другей школи.
На основи податкох з хторима розполага спомнути секретарият, обчекує ше же у новим школским року до першей класи ОШ у Войводини буду уписани коло 17 600 дзеци, цо 300 менєй як прешлого року.