Од нєшка Руски фестивал малих сценских формох „Дюра Папгаргаї”

автор ядю
1k Опатрене

НОВИ САД – У Новим Садзе од нєшка по нєдзелю, 3. децембер, будзе отримани 15. Руски фестивал малих сценских формох „Дюра Папгаргаї”, у орґанизациї Матки-Дружтва Руснацох Нового Саду-Войводини и Городского одбору Рускей матки Нови Сад.

Фестивал будзе у Театралней сали Ґимназиї „Лаза Костич” (Лази Лазаревича 1), дзе на 19. годзин Фестивал отвори Хлопска шпивацка ґрупа Руского културного центру (РКЦ), а потим Владимир Кочиш наступи зоз монодраму „Под образом”.

На соботу, 2. децембра, керестурски Руски народни театер Петро Ризнич Дядя наступи зоз представу „Зазбероваче труплох” по тексту Звонимира Павловича, а у режиї Михайла Зазуляка и Славка Ороса.

Руске КУД „Др Гавриїл Костельник” з Кули ше на нєдзелю, 3. децембра, представи зоз монодраму Ирини Гарди Ковачевич „Милионерка” у виводзеню Амалиї Ковач, а у режиї Янка Лендєра, а потим Драмски студио РКЦ одбави представу „Божеска ноц” по тексту Мира Ґаврана, а у режиї Звонимира Павловича. На концу програми наступи Дзивцока шпивацка ґрупа РКЦ з Нового Саду.

Тогорочни Фестивал малих сценских формох „Дюра Папгаргаї” финансийно потримали Городска управа за културу Нови Сад, Покраїнски секретарият за културу, явне информованє и одношенє з вирскима заєднїцами, Покраїнски секретарият за образованє, предписаня, управу и национални меншини–национални заєднїци и Завод за културу войводянских Руснацох.

ПОВЯЗАНИ ТЕКСТИ