НОВИ САД – Дванасти Медзинародни новосадски литературни фестивал того тижня позбера коло 20 странских и вецей як 30 домашнїх писательох, 15 прекладательох и 30 музичарох, наявене з Городскей библиотеки у Новим Садзе.
На тим фестивалу буду участвовац писателє зоз Анґлиї, Французкей, Нємецкей, Русиї, Польскей, Италиї, Мадярскей, Румуниї, Данскей, Словацкех и других жемох, а жем-госц фестивала Шведска.
Шведска поезия будзе представена у Городскей библиотеки у Новим Садзе, а будзе обявена и Антолоґия сучасней шведскей поезиї зоз творами 12 поетох по виборе Ан Линґебранд. Кажди поета у Антолоґиї будзе представени зоз по 10 писнями у прекладзе Николи Перишича, Деяна Купрешанина, Милени Подолшак и Валентини Клинко Зечевич.
Госци фестивала буду Аурора Луке (Шпания), Ґрета Стодарт (Анґлия), Петер Лауґесен (Данска), Мауро Понци (Италия), Єрґен Линд, Пер Хансон, Ида Берєл, Ан Єдерлунд и Ан Линґебрант (Шведска), Адриян Боднару (Румуния), Мирослав Бєлик (Словацка), Ґеци Янош (Мадярска), Пйотр Милднер-Ниєцковски (Польска), Ив Жак Буен (Французка).
У програмох буду участвовац и Ханс Тил (Нємецка), Ахматов Алексей Дмитриєвич и Роман Круґлов (Русия), Звонко Сарич, Деян Алексич, Радомир Мильойкович (Сербия).
У рамикох фестивала будзе отримани и симпозиюм пошвецени теми „Литература и норма, литература и закон”, о чим буду бешедовац Алпар Лошонц, Драґан Проле, Владимир Ґвозден, Зоран Дєрич, Корнелия Фараґо, Ґорана Раичевич, Боян Йованович, Дамир Смилянич и Драґана В. Тодоресков.
„Диялоґийне представянє” писательох будзе орґанизоване у кафеу „Абсолут” у Змай Йововей улїци, а розгварки буду водзиц критичаре и прекладателє Зоран Дєрич, Драґан Бабич, Душка Радивоєвич и Милица Станкович.
Плановане же би за штири днї були отримани вецей як 30 литературни и музични програми, а репрезентативни вибор авторских прилогох, од поезиї по роботи з обласци критики, будзе обявени у двох текстох „Зланей греди”.
У рамикох фестивала будзе уручена и 12. Медзинародна награда за литературу „Нови Сад” и 57. Бранкова награда.
Програми ше буду одвивац на Площи млодятох, у Библиотеки городу Нового Саду, Шветочней сали Оддзелєня САНУ у Новим Садзе, клубе „Абсолут”, на терасох у Змай Йововей улїци, у ресторанє „Марина”, у Сримских Карловцох, Зомборе и Сримскей Митровици.