РУСКИ КЕРЕСТУР − На седмей туристично-привредно-културней манифестациї „Днї керестурскей паприґи”, традицийно було орґанизоване и стретнуце одкупйовачох зоз продукователями паприґи, а заключене же того року будзе вельо векше понуканє другей класи, цо одвитує одкупйовачом паприґи за преробок, а же будзе зменшане количество першей класи.
Виход на терен бул скромни и анї кус нє здабал на потерашнї виходи кед ше ишло на оглядне польо гибриду. Владимир Шимко дзечнє указал свойо польо засадзене зоз свою сорту червеней керестурскей паприґи на Сейкох. Шимкова паприґа ше находзи на терену дзе каменєц падал лєм раз, алє праве теди направел чкоду од 60 одсто котру преценєла осиґуруюца хижа.
Медзи паприґарами зоз валалу и околних местох, на терен вишли и даскельо фаховци котри толковали паприґаром причини проблемох котри принєсла тота сезона. Винєшене заключене же сезона була досц чежка, а з оглядом же на тей парцели падал и каменєц, паприґа у релативно добрим стану.
Орґанизатором було чежко найсц и заградкарох котри би сцели указац свойо польо, гоч у хотаре єст паприґи котри наисце красни, а тиж тоти на котрих видно тирваци пошлїдки бактериози и дижджовного року, а заш лєм потребне указац и таку паприґу, бо лєм зоз фаховима совитами мож обчековац напредованє у тей обласци. И попри тим, було тих паприґарох котри одкупйовачох поєдинєчно одведли на свойо польо.
Вецей фотоґрафиї мож поопатрац у нашей фотоґалериї.