ШИД – Вчера, 27. юлия, у Лєтнєй владическей резиденциї отворена седма Подобова колония „Руски двор 2017“, хтору вєдно орґанизую парохия Преображеня Господнього и КПД „ Дюра Киш“.
На колониї того року буду твориц 17 маляре з Нового Саду, Зомбора, Шиду, Коцура и Беркасова, а свойо роботи виложа на вистави на соботу на 14 годзин на завераню Колониї.
Уметнїкох и госцох привитал и Колонию отворел о. Михайло Режак, парох у Шидзе и декан сримски, и пожадал вельо успиху у роботи.
У уметнїцкей часци програми свойо поетски твори публики представели Саня Тиркайло, Петра Бошняк, Срдян Малешєвич и Зденко Лазор зоз Сербского литературного клуба „Милош Црнянски“ зоз Шиду, як и маляре и писателє Серафина и Силвестер Макаї зоз Коцура, а програму музично збогацели „Лаза и Джон“.