РУСКИ КЕРЕСТУР – Заменїк предсидателя Општини Кула Кароль Валка вчера нащивел першокласнїкох рускокерестурскей Основней школи „Петро Кузмяк”, а попри привиту до школи, подзелєл им и символични дарунки.
Як и у других основних школох у кулскей општини, и у керестурскей шицки 26-еро школяре першей класи достали дарунки за їх лєпшу безпечносц у транспорту – по флуоресценти лайбик и транспортни буквар, односно едукативну сликовнїцу о транспорту.
Валка новим школяром пожадал успишни рок, спозорююци их же су на драги до и зоз школи учашнїки у транспорту.
На достатих дарункох госцови позадзековали директорка Школи Хелан Пашо Павлович и шицки першокласнїки, з учительку Веруну Медєши.