СЕРБИЯ – За остатнї седем днї гориво на бензинских пумпох у Сербиї подрагшело штреднє за динар, до динар и пол за литру, а маюци у оглядзе збуваня на шветових берзох, мож обчековац же идуцого тижня цени знова порошню, тиж за до динар и пол, гварел за новосадски „Дневник” ґенерални секретар Здруженя нафтних компанийох Сербиї Томислав Мичович.
Вон додал же рост цени сировей нафти на шветовим тарґовищу од 23. марца по 11. април бул 11,2 одсто, но пре тото нє будзе драматичного звекшованя ценох горива на пумпох у Сербиї.
Малопредавацка цена дериватох нафти у Сербиї состої ше з двох часцох – часци хтора идзе компанийом и часци хтора идзе держави, а держави идзе 55 одсто з цени, гварел Мичович.
По його словох, кед же цена сировей нафти у наступним периодзе будзе падац, и цени горива на пумпох у Сербиї буду знїжовани, понеже маме досц моцну таровищну конкуренцию.