РУСКИ КЕРЕСТУР − Тих дньох платани дзири на калдермох по валалє котри после жими були векши и горши як вєшенї. Плановане єшеньске оправянє драгох виостало, та релативно подли стан у шицких местох кулскей општини.
Оправянє драгох плановане з општинским буджетом у 2017. року, медзитим явна набавка котра була розписана за тоту намену була пролонґована пре жалбу єдного спомедзи заинтересованих подприємствох. Явна набавка реализована зоз запожнєньом, та роботи окончени аж тераз.
Перше пооправяна найкритичнєйша улїца у валалє – Сивч Йовґена, а потим платани и други улїци, за цо компетентна Општина Кула. Попри тим, залївани дзири з асфалтом и на улїци Маршала Тита, о чим ше стара ЯП „Драги Сербиї”.
Зоз ярнїма роботами почало и рускокерестурске ЯКП „Руском”, чийо роботнїки на терену з полним капацитетом коша траву, а парк у центру валала, того року першираз покошели ище у марцу, пред Паску.