РУСКИ КЕРЕСТУР – Реконструкция центру у валалє розпочата 15. юния, а єй законченє мож обчековац коло 20. юлия, гоч було наявйоване скорей, роботи одлужени пре части дижджи котри претарговали роботу. За тераз, бехатон коцки вискладани на коло половки запланованих поверхносцох.
Попри реконструкциї дражкох у парку дзе ше поставя бехатон коцки, заплановане заменїц и ошвиценє у парку за цо будзе задлужене рускокерестурске подприємство „Електромонтажа”, а на концу парк достанє нови латки на лавочкох и бетонски канти за шмеце.
Проєкт реконструкциї центру у цалосци финансовани зоз буджету Општини Кула зоз 5 милиони 302 тисячи 867 динарами, а виробок проєкту финансовала Месна заєднїца Руски Керестур пред двома роками зоз 360 000 динарами. Роботи на реконструкциї окончує подприємство „Еко ґрадня” зоз Зренянину, котре пред штирома роками поставяло бехатон коцки у центру на дражки коло Дому култури.
