РУСКИ КЕРЕСТУР – У Хорскей сали Дому култури вчера вечар представена нєдавно видрукована моноґрафия „50 роки Драмского мемориялу Петра Ризнича Дядї”, у присустве єй автора Дюру Латяка и вельочислених почитовательох нашей театралней дїялносци.
У мено єдного з видавательох, Дому култури, директор Йоаким Рац подзековал Министерству култури хторе финансийно помогло, як и шицким цо на даяки способи потримали виходзенє тей значней публикациї хтора вишла з нагоди ювилейного Драмского мемориялу прешлей яри.
О значносци моноґрафиї спред видаватея Заводу за културу войводянских Руснацох бешедовала його директорка Анамария Ранкович, а моноґрафию и обставини у яких настала бешедовал єй автор Дюра Латяк.
– Театрална дїялносц, кед ше нє призначи, як кед би єй анї нє було. У тим контексту и тота кнїжка ма вельку вредносц за нашу театрални живот за хтори ше наздаваме же ше и надалєй отрима и попри шицких почежкосцох – наглашел Латяк.
До дискусиї о актуелним стану и будучносци нашого театру ше уключели и присутни на промоциї. На концу директор Дому култури наявел же промоция моноґрафиї будзе отримана и у Новим Садзе у Заводзе за културу, а кнїжка ше нє будзе предавац, алє будзе подзелєна театралним дїячом и нашим културно-уметнїцким дружтвом и другим институцийом, а достали ю и шицки присутни на промоциї.
