РУСКИ КЕРЕСТУР – Предшколски дзеци нєшка закончую школски рок, а у рускокерестурским Оддзелєню „Цицибан” ПУ „Бамби” з Кули вчера перша ґрупа достала потвердзеня о законченей обовязней Предшколскей пририхтуюцей програми, нєобходней за упис до основней школи, а друга ґрупа потвердзеня достанє нєшка.
У ґрупи виховательки Блаженки Мецек дзеци вчера отримали закончуюцу програму за родичох, на хторей указали часточку того цо през рок научели и достали спомнути потвердзеня, а нєшка подобна програма будзе и у ґрупи виховательки Емилиї Костич.
Предшколску програму у керестурским Оддзелєню ПУ „Бамби” закончели 26-еро дзеци, кельо и у писани до першей класи ОШ „Петро Кузмяк”.
