ВЕРБАС – Вчера, 8. марца, у просторийох КПД „Карпати“ у Вербаше, з нагоди Медзинародного дня женох отримани три програмни цалосци – перше Дружтво за руски язик, литературу и културу представело 15 свойо найновши виданя, потим отворена вистава скулптурох, а преслава закончена з програму наймладших членох КПД.
На промоциї кнїжкох спред Дружтва за руски язик, литературу и културу бешедовали Ирина Папуґа, мр Гелена Медєши, др Юлиян Рамач и Владимир Салонски, а Папуґова з тей нагоди „Карпатом” подаровала представяни виданя Дружтва.
Виставу скулптора Милорада Правульца, длугорочного симпатизера КПД „Карпати”, отворел предсидатель Здруженя „Ателє 05” Драґан Симич, а на отвераню присуствовали и други члени „Ателєа”.
На 18 годзин почала програма наймладших членох вербаского дружтва и дзецох котри у основних школох у Вербаше виучую руски и українски язик. Вецей як 30 учашнїки прицагли числену публику, а патрачох привитали народна посланїца Олена Папуґа и предсидатель Дружтва др Деян Загорянски, котри госцох и Вербащанох привитал и на спомнутих двох програмох.
Дзеци зоз своїма учительками Славицу Мали, Славку Тамаш и Олю Станков пририхтали числени рецитациї, музични точки и шпиванки з тему Дня женох, а на концу Дзецинска фолклорна ґрупа виведла найновшу хореоґрафию „Жатва“.