Путешествиє до Ждинї и нє лем

автор яким винаї
1.7k Опатрене

Отворени простор дава вецей способи доживйованя самого искуствия „Лемковскей ватри”, дзе шатри змесцени висше од самей бини, на брегу, и у каждим моменту мож провадзиц и сам Фестивал и шицко цо ше долу случує, а же би ше нє ишло далєй од самого змесценя.

Вовторок, 24. юлия, у позних пополадньових годзинох зоз Ждинї у Польскей врацели ше млади котри були на екскурзиї Роботного цела за младеж Националного совиту Руснацох. Гоч першобутно було плановане же би на тото путованє пошли дванацецеро млади зоз шицких наших местох, пре обєктивни причини, на фестивал „Лемковска ватра” до Ждинї зоз Руского Керестура вчас рано, пияток 20. юлия, рушели осмеро.

ЗМЕСЦЕНЄ НА ОТВОРЕНИМ

На конкурс хтори розписало Роботне цело за младеж Националного совиту Руснацох, явели ше коло 10 млади особи зоз скоро шицких местох у котрих жию Руснаци, а условия котри мушели сполнїц, медзи иншим, були же муша буц активни у културним, або просвитним живоце и уписани до Окремного виберацкого списку. На таки способ вибрани Деян Папуґа, Милица Кнежевич и Йован Живкович зоз Руского Керестура, Владимир Венчельовски зоз Нового Саду и Алексей Виславски зоз Дюрдьова. Делеґацию предводзел предсидатель Роботного цела за младеж Сашо Сабадош зоз Зомбора, а зоз нїм ишли и двойо члени того цела – Яким Винаї зоз Руского Керестура и Хелена Папуґа зоз Вербасу.

Прешлого року така екскурзия организована у Свиднїку у Словацкей, а того року то була „Лемковска ватра” у Ждинї у Польскей. Тогорочна екскурзия ше од прешлорочней розликовала и по тим же змесценє було на отвореним, точнєйше кажде мал задаток остарац ше и зоз собу вжац шатор за кампованє и мех за спанє.

Отворени простор дава вецей способи доживйованя самого искуствия „Лемковскей ватри”, дзе шатри змесцени висше од самей бини, на брегу, и у каждим моменту мож провадзиц и сам Фестивал и шицко цо ше долу случує, а же би ше нє ишло далєй од самого змесценя. Вшелїяк же „Лемковска ватра” зоз вецей углох здабе на нашо фестивали, алє заш лєм, ма цошка окремне цо треба видзиц и дожиц. Тиж так, и хвиля барз швидко може погубиц цале дожице, алє, на щесце, праве тот викенд було слунечно и цепло. Треба наглашиц же члени тей екскурзиї мали окремни статус, були привитани як госци и уживали у шицких вигодносцох котри було, як цо то окремни паркинґ, безплатни уход и камп, бони за єдзенє и друге, а шицко тото насампредз орґанизовал Сашо Сабадош.

КРАКОВ И БАРДЕЙОВ

Пред тим як ше сцигло до Польскей, перша станїца бул Прешов и окрипенє после длугей драги. По програми путешествия, у Ждинї требало остац до пондзелку рана, кеди була планована факултативна нащива Кракова, а потим драга до Бардейова у Словацкей, алє як то уж и идзе при младих, єдногласно одлучене же би ше уж внєдзелю рушело до Кракова и там ноцовало. То була окремна нагода же би ше нащивело тот прекрасни туристични город, и же би було вецей часу за розвагу, а нє лєм факултативно, як першобутно плановане. До Кракова ше сцигло нєдзелю пополадню, змесценє було орґанизоване у хостелу у самим центру и до пондзелку, до поладня, бул час предвидзени за розвагу и упознаванє зоз Краковом, його историю и културу.

Пондзелок коло поладня ше рушело на уж добре познату дестинацию, до Бардейова у Словацкей, дзе тиж було часу за шпацир, розвагу и остатнє ноцованє пред драгу до дому. Вовторок дополадня, направена ище єдна станїца у Прешове же би ше окончело остатнї пририхтованя за длугоку драгу до Керестура, купени лакотки, сувенири, єдзенє и вода за драгу.

Пракса свойофайтовей награди за шицких младих Руснацох установена прешлого року, кед Роботне цело одлучело же єдну часц буджету зоз хторим розполага опредзелї праве за таки екскурзиї, же би на одредзени способ стимуловало младих же би ше цо вецей активовали у своїм штредку, правели вязи медзи младима Руснацами, а шицко тото през якуш нєформалну орґанизацию и друженє.

Потераз ше указало же тота екскурзия дава резултати, млади задовольни, прави ше вязи и контакти, и вшелїяк же треба таку праксу и предлужиц.

ФУЗИЯ ТРАДИЦИЙНОГО И СУЧАСНОГО

Предсидатель Роботного цела за младеж Националного совиту Руснацох Сашо Сабадош, гарел же упечатки вязани за нащиву младих тогорочней „Лемковскей ватри” вецей як позитивни. Одличне же ше им того року заш удало одвесц ґрупу младих Руснацох на єден фестивал на Горнїци як цо то було влонї з одходом на „Русински фестивал” до Свиднїку, гвари Сабадош и назадава ше же Роботне цело и у шлїдующим мандату предлужи зтаку праксу.

– Друга значна ствар хтору мушим спомнуц то же сам одход на „Лемковску ватру”, по моїм думаню, охабел барз добри упечаток на наших младих и же тота одлична фузия традицийного и сучасного яка ше уж вецей роки успишно реализує у Ждинї то єдно искуство хторе млади, на хторих остава реализация будуцих змистох у нашей култури, можу голєм з часци применїц и у наших условийох. Тиж так, важне визначиц же учашнїки у нашей екскурзиї нє лєм упознали єден аспект Горнїци хтори по тераз нє знали, алє ше упознали медзисобнє и створели вязи хтори можу буц претворени до чогошик цо важне и на медзилюдскей, и на креативней бази – гварел Сабадош.

ПОВЯЗАНИ ТЕКСТИ