РУСКИ КЕРЕСТУР – У Руским Керестуре ЯКП „Руском” розчисцело шицки явни поверхносци, а зоз власних средствох и драги по валалє. На велїх дражкох опрез обисцох и погосцительних обєктох ище вше єст шнїгу, алє то обовязка хтору їх власнїки нє сполнєли.
Дзекуюци доброму сотруднїцтву и догварки, ЯКП „Руском” анґажовало Михала Раца же би зоз їх розгартачку и його власним трактором нєшка рано од 6 до 11 годзин пред поладньом розчисцел шицки драги у валалє, так же кажда улїца преходна.
Заняти у „Рускому” розчисцели шнїг зоз шицких паркинґох у валалє, дражкох опрез явних установох, у центру и у паркох. Попри тим, розчисцели и теметов, а вшадзи руцена и соль. Медзитим, як Рутенпрес дознава од директора „Рускому” Иґора Фейдия, соль нє реаґує на температури нїзшей од минус 6 ступнї Целзиюсовей скали.
Улїцу Маршала Тита у Керестуре, понеже є реґионална драга, розчисцело ЯП „Бачкапут” рано коло 7 годзин, кед посипали и ризлу зоз солю. ЯКП „Комуналєц” зоз Кули почало з роботу розчисцованя драгох нєшка рано, а робя зоз зменшану механїзацию, та ище нє рочисцени анї шицки улїци у Кули.
