НОВИ САД – Одбор за културу и явне информованє Скупштини АПВ потримал инициятиву представительох явних глашнїкох националних меншинох-националних заєднїцох з Войводини же би ше з ребалансом покраїнского буджету у наиходзацих мешацох звекшало субвенциї друкованим медийох, хтори софинансує Покраїнски секретарият за културу, явне информованє и одношеня з вирскима заєднїцами.
Субвенциї за видаванє новинох и часописох на язикох националних меншинох-националних заєднїцох 2016. року зменшани за 10 одсто и на таким уровню остали и у тим року, а як визначели їх представителє, врацанє тих 10 одсто би барз допринєсло лєпшому функционованю меншинских новинско-видавательних установох.
О актуалним стану у явних глашнїкох на язикох националних меншинох-националних заєднїцох на скупштинским Одборе за културу и явне информованє бешедовали представителє шицких дзевец НВУ хтори софинансує спомнути покраїнски секретарият, а у мено НВУ „Руске слово” на схадзки присуствовала директорка мартица Тамаш.
