Умарла Ксения Мучаї

автор ядю
1.1k Опатрене

БАЧКИ ПЕТРОВЕЦ – Вчера умарла Ксения Мучаї (1940-2018), народзена Планчак, дзецинска писателька и учителька.

Ксения Мучаї народзена у Руским Керестуре 8. септембра 1940. року, дзе закончела и основну школу, а школованє за учительку предлужела у Зомборе. Як млади просвитни роботнїк почала робиц у своїм родним месце, алє нєодлуга ю животна драга одведла до Бачкого Петровцу дзе предлужела робиц у просвити, алє тераз на словацким язику.

Понеже добре звладала и словацки, Ксения Мучаї почала писац приповедки на двох язикох. Перши приповедки по словацки обявени єй у дзецинским часопису „Пионєри”, а од 1974. року, почали ше з часу на час зявйовац и на руским язику у „Пионирскей заградки”. Так ше помали формовала до писателя котри твори двоязично, потвердзуюци на свой способ вредносци преплєтаня културох и литературох двох народох. Єй твори були обявени и у часописох ЧССР „Вчєлка” и „Зорнїчка”, як и у дзецинских часописох у Мадярскей.

За свойо приповедки достала и даскельо награди на конкурсох – трецу награду на конкурсу часопису „Пионєри” за приповедку „Партизанє” (1972) и „Диждж зоз пипки” (1975), а першу награду достала за приповедку „Мед” (1973). Истого року була єй друкована и кнїжка за дзеци на словацким язику „Чаривни дзвончок” у виданю НВП „Обзор” у Новим Садзе.

З рукописом кнїжки „Гвиздочки ходза по жеми” участвовала на Литературним конкурсу за кнїжку прози за дзеци НВП „Руске слово” 1974., а видрукована є 1978. року. Єй приповедки находза ше и у Зборнїку текстох за предшколски дзеци „Ластовички 2”, хтори Дружтво за руски язик, литературу и културу видало 2005. року.

Ксения Мучаї єден час була директорка Предшколскей установи „Вчєлка”, була одата за словацкого писателя Павела Мучая з Бачкого Петровцу, дзе жила и робела.

Вичная памят!

ПОВЯЗАНИ ТЕКСТИ