Усвоєни буджет АПВ за наиходзаци рок

автор ядю
986 Опатрене

НОВИ САД – Посланїки Скупштини АП Войводини (АПВ) вчера, 21. децембра, после вецейгодзиновей розправи, прилапели буджет за 2018. рок, хтори будзе 68,5 милиярди динари.

За предложени буджет гласали 74-еро посланїки, 21 опозицийни посланїк бул процив, а єден стримани. Опозиция оценєла же буджет нє виноши седем одсто републичного буджету, як и же три седмини буджету нє наменєни за инвестициї, а окреме же ище вше нє принєшени Закон о финансованю АПВ.

Предсидатель Покраїнскей влади Иґор Мирович виявел же главна характеристика тогорочного буджету АПВ же скоро 40 одсто вкупних средствох наменєни економскому розвою.

– Буджет за пейц милиярди динари векши дзекуюци розлики хтору направели заняти у компанийох, бо часц порциї на добиток правних особох и порцийох на доходок гражданох припада и тому буджету. Прето важне инвестованє до економиї, бо зме у шлїдуюцим крочаю годни укладац до здравства, школства, социялней защити, инфраструктури у менєй розвитих штредкох и индзей – визначел предсидатель Покраїнскей влади Иґор Мирович толкуюци найзначнєйши проєкти з буджету у 2018. року.

Мирович гварел и же наиходзацого року буду звекшани капитали укладаня у комуналней обласци, за драги, будзе уложене до образованя, здравственей защити и польопривреди, у чим вельо допоможе и ИПАРД програма.

 

ПОВЯЗАНИ ТЕКСТИ