РУСКИ КЕРЕСТУР – У Велькей сали Дому култури всоботу вечар, 5. мая, Амалия Ковач успишно и прешвечлїво виведла монодраму „Милионерка” по тексту Ирини Гарди Ковачевич, у режиї Янка Лендєра а у продукциї РКУД „Др Гавриїл Костельник”.
На жаль, барз мале число керестурскей публики могло уживац у одличним уж пиятим виводзеню „Милионерки”, и здогаднуц ше або дознац вецей о тим нє лєгким чаше и економскей кризи и инфлациї пре воєни зраженя на тих просторох, а през женски окуляри мацери, занятей жени и ґаздинї.
Як за Рутенпрес виявела ґлумица Амалия Ковач, „Милионерка” ше пласовала на Покраїнску смотру, а нєодлуга ма буц виведзена и у Коцуре.
