Фарбенє закончене, почали роботи коло терену за одбойку

автор мар
975 Опатрене

РУСКИ КЕРЕСТУР – Волонтере учашнїки дванастого Медзинародного волонтерского кампу у Руским Керестуре уж поробели векшину запланованих роботох, а остало им докончиц лєм правенє терену за одбойку на писку на локалним базену.

Волонтерска робота була подзелєна до трох часцох – фарбели ограду коло Катедралней церкви св. оца Миколая и коло будинку замку, були пораїц двор у найстаршей рускей хижи, дзе тирваю роботи на єй адаптованю и конзервованю, а остатнї три днї правя терен за одбойку, на котрим будзе орґанизовани турнир по його законченю, на котри поволанка за участвованє ище вше отворена.

Потераз волонтере участвовали на роботнї правеня домашнїх галушкох зоз Здруженьом женох „Байка”, були на екскурзиї, даскельо раз нащивели Водицу, вожели ше на парадних запрагох зоз членами Конїцкого клубу „Русин”, нащивели локални музей и др.

Волонтерски камп у Руским Керестуре почал пондзелок 23. юлия, а будзе тирвац по 4. авґуст. Отримованє кампу потримали числени приватни поднїмателє, здруженя, орґанизациї и гражданє Руского Керестура. Лидер тогорочного кампу млади атлетичар Деян Будински зоз валалу, а колидер Вук Муйович зоз Беоґраду. Вони двоме задлужени за план и програму роботи у кампу, як и за отримованє позитивней атмосфери.

Орґанизаторе и тогорочного кампу Туристичне здруженє Руски Керестур и орґанизация Млади виглєдоваче Сербиї по проєкту „Млади су закон”. Домашня им Любица Няради котра, медзи иншим, задлужена за цалосне костиранє, векшину активносцох окончую у просторийох Каритасу, а змесцени су у Спортскей гали.

ПОВЯЗАНИ ТЕКСТИ