Апелацийни суд понїщел позарядову Скупштину „АБЦ ФУД”

автор зам
859 Опатрене

РУСКИ КЕРЕСТУР – Апелацийни привредни суд прилапел жалбу Зорана Булатовича на зволованє позарядовей Скупштини керестурского Привредного дружтва „АБЦ ФУД” хтора отримана 26. децембра прешлого року у Оджаку, з чим шицки одлуки принєшени на тей Скупштини нєлеґитимни. Най здогаднєме, Привредни суд у Зомборе спомнуту схадзку зволал на вимогу векшинскей власнїци „АБЦ ФУД” Виолети Шулеич, на хторей Булатович зменєни з места вивершного директора, меновани други, а Шулеичова постала и єднa з троїх дополнююцих овласцених подписнїкох.

Апелацийни суд ище 24. децембра 2014. року видал Ришенє о утаргованю зволованя схадзки Супштини и поступок врацел на першоступньови суд, а до Привредного суду у Зомборе и „АБЦ ФУД” Ришенє сцигло 8. януара того року. Нови директор вибрани на спомнутей Скупштини, Александар Арбутина, до Аґенциї за привредни реґистри (АПР) уписани 6. януара – дознава Рутенпрес од Зорана Булатовича, котри и надалєй роби у керестурскей хладзальнї.

– Я о тим шицким обвисцел и власнїцу, директора и Одбор директорох, алє хаснуєм и шицки правно можлїви средства же би ше престало з нєзаконїтима роботами, та сом о нїх поинформовал и Апелацийни привредни суд и його предсидателя, директора Аґенциї за привредни реґистри, Министерство привреди и Министерство правди, предсидательку Привредного суду у Зомборе. У моєй жалби сом вимагал же би судия дал дочасову забрану на упис нєлеґитимно вибраних особох по одлуку АПР, цо вон теди нє зробел, а ґу тому, як сом дознал, терашнї директор за подписованє актох у мено фабрики хаснує стари, нєважаци печац дакедишнього директора пред уводзеньом предликвидациї, цо тиж нєлеґитимне и поволал сом го же би печац придал на комисийске знїщованє – гварел Булатович.

Як толкує, на основи понїщованя Скупштини Привредни суд би го мал врациц на место вивершного директора, АПР би мал висцерац особи уписани до АПР о заступаню фабрики и же би ше предлужело правни континуитет од 24. децембра прешлого року, односно од одлуки Апелацийного суду.

Спрам його спознаньох, Привредни суд за 9. фебруар зволал розправу на хторей би мала буц зволана нова позарядова схадзка Скупштини, цо по думаню Булатовича тиж потупйованє законох, бо ше з тим сце прескочиц єден нєзаконїти период роботи „АБЦ ФУД”.

ПОВЯЗАНИ ТЕКСТИ