Руска матка по конєц рока орґанизує Стретнуце поетох РМ, Подобову колонию, перши „Русин филм фест”, Руски фестивал малих сценских формох „Дюра Папгаргаї”, будзе участвовац на преслави Дня Русинох/Дня Лемкох у Ґорлицох у Польскей и на Медзинародним фестивалу мултижанровей русинскей музики „Русин фест 2016”.
Схадзка Управного одбору Рускей матки (РМ) и Редакцийного одбору глашнїка РМ „Руснак”, на хторей бешедоване о наиходзацих културних манифестацийох и збуваньох у хторих РМ будзе участвовац, орґанизовац, лєбо соорґанизовац, та о пририхтованю идуцого числа глашнїка „Руснак” отримана у Руским Керестуре пияток, 12. авґуста.
Члени Рускей матки початком септембра у Руским Керестуре буду орґанизовац Стретнуце поетох РМ, а як гварела орґанизаторка того вечара Мария Дорошки, до того проєкту жада уключиц цо вецей младих. Пошвидко после того у Коцуре будзе Подобова колония „Коцур 2016”.
По предвидзеним календаре, 24. и 25. септембра у Петровцох у Горватскей будзе Културна манифестация „Кед голубица лєцела”. О тидзень, 1. и 2. октобра заказани аж два културни збуваня – у Руским Керестуре будзе 55. фестивал рускей култури „Червена ружа”, а у Шидзе перши „Русин филм фест”. Руска матка єдна з орґанизоторох „Русин филм фест”-у, а як гварел Дюра Папуґа, на нїм будзе приказане страданє Русинох у Першей шветовей войни, у лаґру „Талергроф” у Австриї. Праве з тим проєктом Руска матка конкуровала за средства до Покраїнского секретарияту за културу и явне информованє, а на схадзки предсидатель РМ Дюра Папуґа поинформовал членох же по конкурсу за софинансованє програмох и проєктох у обласци защити нєматериялного културного скарбу и сучасней уметнїцкей творчосци националних меншинох-заєднїцох у АПВ достали 12 000 динари. З тей нагоди виражел нєзадовольство же того року барз мало пенєжи опредзелєне за обласц култури, та так менєй пенєжи достала и Руска матка.
Два мешаци после, першого викенда у децембру будзе 14. Руски фестивал малих сценских формох „Дюра Папгаргаї”, а у Ґорлицох 5. децембра будзе манифестация з нагоди означованя и преслави Дня Русинох/Дня Лемкох у Польскей. Штредком децембра у Бардейове у Словацкей ше отрима 4. Медзинародни фестивал мултижанровей русинскей музики „Русин фест 2016”, гварене на схадзки.
Концом юлия вишло перше тогорочне число глашнїка Рускей матки „Руснак”, а редакция уж пририхтує други, хтори видзе у першей половки септембра.