КУЛА – На туристично-културней манифестациї Днї традициї Мадярского културного центру „Непкер”, хтора на кулским Ґедеру отримана всоботу, 5. сепетембра, участвовали и Керестурци – поднїматель Владимир Рацпети и Фолклорни анасамбл ветеранох Дому култури.
Владимир Рацпети Петко, власнїк тарґовецких предавальньох у Керестуре, на манифестациї ше змагал у вареню овчого паприґашу у котлїку, а у исти час, дополадня отримане и змаганє екипох у малим фодбалє. У обиднох змаганьох з найвекшей часци участвовали екипи приватних поднїмательох и явних подприємствох з местох кулскей општини.
Ветеранє-танєчнїки Дому култури Руски Керестур на манифестциї наступели пополадню з танцом „Вербунґ на Горнїци”, у хорфеоґрафиї Ґабриєли Саянкович, а у културней часци програми участвовали и аматере Мадярского културного центру (МКЦ) „Непкер” и КУД „Сербия” з Кули.
Манифестацию уж осми раз орґанизує МКЦ „Непкер”, з потримовку локалней самоуправи, так же ю отворела предсидателька Скупштини општини Кула Снежана Мркаич. У мено домашнїх присутних привитал општински одборнїк Кароль Валка.
Бул то штварти наступ Дому култури Руски Керестур на манифестациї мадярскей националней заєднїци у Кули, на хторей присуствовала и делеґация городу Калоча з Мадярскей, з хторим Кула побратимена.
