Keд пред 170 роками видумана перша бициґла, нїхто анї нє подумал же постанє универзална превозка за котру вше векши проблем будзе направиц простор по котрим ше вона будзе рушац, дражки, як ю саму. Гоч ше бициґли вецей гонї по валалох як по городох, бо там менши транспорт, спортски дружтва и дружтвени орґанизациї апелую же би бициґла постала основна превозка и у вельких местох – рухома є и швидка, нє заґадзує животни штредок, нє драга є и тунє ю отримовац, нє вимага широки драги и нє забера вельки паркинґ простор.
Од першей бициґли по нєшка, превозне средство на два колєса ше нє пременєла вельо – єй конструкция и механїзем ше лєм усовершовали и прилагодзовали, и постала почитована у цалим швеце. Пременєли ше условия у котрих ше гонї – од драгох на котрих нє було вельо превозки, насампредз автомобили, нараз почала завадзац, и бициґлисти пребарз части жертви у транспорту.
У городох дзе вельки транспорт, за ню потребна дражка по котрей ше бициґли буду рушац, и места дзе ше ю охаби на чуванє. Вона постала часта роба за крадзи, а квалитетни бициґли нє тунї. Полиция ридко пренаходзи крадошох, а вони то знаю и злохасную.
Места у котрих ше зна цо значи бициґла за єден город, и знаю шицки єй предносци, отримую бициґлистични дражки, транспорт прилагодзую новим условийом и реґулую го же би назберали цо вецей прихильнїкох за гонєнеє бициґлох. Причини єст наисце вельо – рухома є и швидка, нє заґадзує животни штредок, нє драга є и релалитвно ю туньо отримовац.
НОВОСАДСКИ ДРАЖКИ
У Новим Садзе бициґлистични дражки єст на шицких булеварох и ширших драгох, односно, направени су на тих драгох дзе було за нїх места. То наисце за похвалу, бо нєт вельо места котри ше з тим можу похвалїц.
Медзитим, пре нє допатранє дражкох, котри ше часто находза помедзи шорами древох, дражки барз розгубени и так повесц нє мож по нїх вожиц..
– Требало скоро штири роки модлїц городски власци же би оправели бициґлистични дражки на Футожскей драги, єдней зоз найобточнєйших у Новим Садзе. Обновена є лєм з часци, а число бициґлистох у нашим городзе вше векше – Марко Трифкович, предсидатель Новосадскей бициґлистичней инициятиви.
Перши нєзадовольни зоз бициґлистичнима дражками були Ветерничанє и Футожанє. Кед ше после штирох рокох апелованя и протестованя дражки дакус ушорело, такой ше явели и жителє зоз скоро шицких перших местох коло Нового Саду – Руменки, Катю, Бачкого Ярку… Дражки би им моглли буц сиґурни драги место за приход до Нового Саду, а нє мушели би хасновац городски превоз.
ЗБЛЇЖОВАНЄ ДЮРДЬОВА И ЖАБЛЮ
Идея же би ше виасфалтовало бициґлистичну дражку медзи Жабльом и Дюрдьовом постої уж даскельо децениї. Медзи тима двома местами єст коло штири километри, а понеже Жабель општинске место и тамявни иституциї, Дюрдьовчанє часто примушени прейсц през тоту релацию.
– У општинскей управи зме на вецей заводи предкладали же би ше виасфалтовало дражку од виходу Дюрдьова по уход до Жаблю, бо за таке єст простору коло драги, а гражданом би то значело. Медзитим, ище вше зме нє наишли на потримовку идеї котра би була идеалне ришенє у вецей сеґментох за наших валалчанох. Могли би ше прешейтац, або на бицили пойсц до Жаблю – гварел Александар Голуб секретар МЗ Дюрдьов.
Понеже ше Жабель находзи у штредку трох местох, Чуроґу, Ґосподїнцох и Дюрдьова, котри припадаю жабельскей општини, и од каждого є одалєни коло пейц километри, дражки медзи валалами би ше здали каждому месту.
Так, кед Чурожанє, Ґосподїнчанє и Дюрдьовчанє иду на бициґли до Жаблю, гоня по драги коло швидких автомобилох и других превозкох и нєпреривно су у гужви у транспорту, бо драга през валал повязує маґистралну и авто-драгу Суботица–Беоґрад.
ДРАЖКИ КОЛО ДРАГОХ
Єст вецей места котри нашли ришенє и защицели своїх гражданох. Медзи иншим и Месна заєднїца Сириґ, котра пред вецей як двацец роками вибетоновала бициґлистичну дражку ґу Србобрану, односно дакедишнього польопривредного комбинату до котрого людзе кажде рано одходзели робиц, а нєпреривно були у опасносци од швидких превозкох.
Исто так и два места, Бачки Ярок и Темерин, котри у ствари злучени и длугоки коло шейсц-седем километри, коло главней драги маю дражку за бициґли. Вона постої вецей як трицец роки.