РУСКИ КЕРЕСТУР – Нєшка на Драмским мемориялу, дзецинску представу „Кандур у чижмох” хтору пририхтали ґлумци з домашнєй Школи „Петро Кузмяк” провадзели и 170-ецеро дзеци з наших местох хтори виучую руски язик з елементами националней култури. Їх нащиву уж традицийно орґанизує Одбор за образованє Националного совиту Руснацох.
На Мемориял зоз своїма наставнїцами припутовали школяре зоз скоро шицких местох – Коцура, Кули, Вербасу, Савиного Села, Нового Саду, Дюрдьова, Ґосподїнцох, Бачкей Тополї и Нового Орахова, як и дзеци зоз Шиду и Бачинцох.
Шицки вони у преполней сали, вєдно з домашнїма школярами нїзших класох ОШ „Петро Кузумяк” як и предшколскима дзецми з керестурского оддзелєня „Цицибан”, провадзели представу.
По представи на бини Дому култури отримана и кратка програма у хторей ше представели праве школяре-госци зоз дванац точками. Вони рецитовали, шпивали и грали, а на концу домашнї школяре трецей и штвартей класи одшпивали шпиванку „Хто щешлїви” у хторей участвовала и публика.
Госци потим пошли на закуску хтору им пририхтали у домашнєй Школи, дзе час по врацанє дому, препровадзели у бависку и друженю.
Тоту подїїю провадзели и предсидателька Одбору за образованє Мелания Римар, заняти у Служби НС и директорка Школи „Петро Кузмяк” Хелена Пашо Павлович.
Вецей фотоґрафиї мож поопатрац у нашей фотоґалериї.