РУСКИ КЕРЕСТУР – Тогорочна туристично-привредно-културна манифестация „Днї керестурскей паприґи” будзе 13. и 14. авґуста у Руским Керестуре, а орґанизаторе -Здруженє паприґарох „Капсикум анум” и Конїцки клуб „Русин” и того року наявели богату и рижнородну програму.
Соботово змисти почню на 11 годзин на оглядним полю на Ярашу, дзе нащивителє годни опатриц даскельо файти паприґи и поровнац рижни способи єй хованя, а потим буду отримани и фахово консултациї. По отверанє Манифестациї плановани обиходзеня ище двох-трох польох под паприґу.
„Днї керестурскей паприґи” на соботу, 13. авґуста урядово буду отворени на 17 годзин у центре валалу, а ту на коло 25 штандох буду представени рижни нашенково, хемийни и осиґуруюци хижи, продукователє желєняви и домашнїх продуктох и виробкох. У центре будзе и културно-уметнїцка програма, варенє традицийних єдлох, дзецински маскенбал и додзельованє наградох.
Орґанизаторе на отвераню обчекую и представительох Покраїнского секретарияту за польопривреду, водопривреду и лєсарство и Општини Кула, хтори финансийно потримую манифестацию.
Други дзень, 14. авґуста, „Днї керестурскей паприґи” буду на Гиподроме „Леї”, дзе на 14 годзин почню обегованя запрагох коньох, алє и рижни провадзаци змисти.