Драмски мемориял од 15. по 18. октобер

автор м. афич
652 Опатрене

РУСКИ КЕРЕСТУР – Пейдзешат други Драмски мемориял „Петра Ризнича Дядїˮ почина на штварток, 15. и будзе тирвац по 18. октобер. Пре познату епидемиолоґийну ситуацию Мемориял будзе у вименєней форми, тє. на нїм буду три видео-проєкциї скорейших представох у продукциї РНТ „Петро Ризнич Дядяˮ, и єдна премиєра у продукциї Драмского студия „Артˮ Дому култури Руски Керестур.

Перши три днї, тє. 15., 16. и 17. октобра на бини Дому култури у велькей сали з початком на 19 годзин, на видео-биму буду приказани – представа Едґара Валса „Кинґ-конґˮ, у режиї Цвєтина Аничича, други вечар проєкция представи „Зборне местоˮ Душана Ковачевича, а режисера Владимира Надя Ачима и треци вечар представа „Национална страґедияˮ автора и режисера Славка Ороса.  Мемориял будзе закончени зоз премиєру монодрами „Сон щешлївого чловекаˮ автора Фйодора М. Достоєвского хтору режира Владимир Надь Ачим, а виводзи Мирослав Малацко.

Пре предписани мири здравственей безпечносци, Драмски мемориял годно провадзиц огранїчене число публики, цо лєм 130 особи. Поставени и дезобариєри, окончи ше и дезинфекция рукох и меренє температури цела на уходзе до сали,  а тиж обовязни маски за патрачох, прето треба же би пришли дакус скорей пред початком представи. Уходнїци за кажду представу 100 динари.

ПОВЯЗАНИ ТЕКСТИ