КОЦУР – З Литературним вечаром на хторим представена ткв. „Мала антолоґия рускей поезиї”, вчера у Коцуре почал тогорочни Фестивал фолклору Руснацох „Коцурска жатва”. Пре нєвигодну хвилю, Литературни вечар отримани у Велькей сали Дому култури, а нє у лєтнєй учальнї ОШ, як було плановане.
На Литературним вечаре, з хторим означени 130-рочнїца народзеня Гавриїла Костельниа, 80-рочнїца народзеня Дюру Папгаргая и 20-рочнїца шмерци Владимира Ґарянския, представени вибрани, антолоґийни писнї руских поетох – Гавриїла Костельника, Юлияна Тамаша, Гавриїла Надя, Силвестера Макая, Михала Ковача, Владимира Ґарянския, Мариї Яким, Славици Шовш, Дюру Папгаргая, Агнети Бучко Папгаргаї, Наталиї Дудаш, Наталиї Канюх, Ирини Гарди Ковачевич и Михала Рамача.
Писнї спомнутих поетох рецитовали Мелания Мали, Емилия Чизмар, Наташа Медєши и Сандра Стрибер з Коцура и Александра Лендєр з Вербасу, а специялни госц на програми бул наш ґлумец и рецитатор Михайло Зазуляк, котри гуторел стихи Г. Костельника, М. Ковача и Дю. Папгаргая.
Автор и модератор Литературного вечару на „Коцурскей жатви” бул Микола Шанта, котри и сам пречитал єдну писню М. Рамача, прейґ видео-биму пущани архивни знїмки дзепоєдних спомнутих авторох (хтори обезпечела РТВ), а у музичней часци програми Гелена Папуґа а капела одшпивала три шпиванки.
По Литературним вечаре у голу Дому култури отримана програма „Тамбурованє” – друженє за младих з музику, на хторим грал тамбурови оркестер „Коцурски бетяре”. Тоту програму финансийно потримало и Роботне цело за младеж Националного совиту Руснацох.