НОВИ САД – Трицец перши Фестивал новей рускей народней шпиванки „Ружова заградка” отримани вечар на Мишелуку, у новим амбиєнту и новим будинку РТВ. Фестивал ше одвивал у Вельким студию, а публика го могла провадзиц и у голу прейґ видео бимох, пре почитованє епидемийних мирох.
Фестивал святочно отворел заменїк ґенералного директора РТВ Йожеф Клем, а програму водзели Марина Сабадош и Доротеа Будински.
На Фестивалу виведзени 14 од 16 нових композицийох, а гласац могла лєм присутна публика.
Пейцчлени жири у составе: Миролюб Мича Янкович, Дюра Будински, Микола М. Цап, Сенка Станкович и Снежана Янюшевич Єфтич вибрали побиднїкох побиднїцки писнї и награди.
Повелю за найлєпши текст достала Олена Планчак Сакач за писню „Любов як писня”, Повелю за найлєпши аранжман достал Боян Милинкович, а Повелю за найлєпшу интерпретацию достала Ивана Чордаш. Наградзени достали и пенєжни награди.
Треце место освоєла композиция „Шумна шпиваночка” автора Ани Бучко, друге „Коло води верба” авторки Агнети Тимо Мудри, а за побиднїцку преглашена „Крочаї милого” тиж Агнети Тимко Мудри котру одшпивала Дарина Михняк.
Публика зоз 88 гласами за найлєпшу вибрала композицию „Тебе шпивам”, котру виведол автор Михайло Будински.
У ревиялней часци виведзени дзевец композициї, хтори зоз народних преробени до забавних.
Фестивал бул директно преношени прейґ радия и телевизиї, як и прейґ интернету, а понеже ше того року отримує у нєзвичайним єшеньским термину, Руска редакция Радио Нового Саду зняла и ЦД.