НОВИ САД – Внєдзелю, 18. децембра, у рамикох 26. Дньох Миколи М. Кочиша нащивени Руски теметов у Новим Садзе, цо була и остатня активносц у рамикох тогорочней манифестациї, хтору традицийно орґанизує Дружтво за руски язик, литературу и културу (Дружтво).
Днї Миколи М. Кочиша почали 1. децембра, а образовно-културни програми, односно годзини руского язика отримани у Доме школярох „Бранково коло” у Новим Садзе, у школох у Новим Орахове и Кули, у предшколскей установи у Новим Садзе, отворени три вистави подобових роботох – Сонї Папуґа Андєлич и з Подобовей колониї „Стретнуце у Боднарова” у Новим Садзе и Гелени Фейди Крклюш у Ґосподїнцох, а у Новим Садзе бул и Округли стол о руским язику и литератури.
Внєдзелю на Руским теметове представителє Дружтва нащивели гроби о. Йована Храниловича (1855-1924), учителя Осифа Фа (1882-1971), учительох Михаила Лїкара, Миколи Будинского, Вишошевичових и родичох Миколи М. Кочиша. Сам Микола М. Кочиш поховани на Городски теметове у Новим Садзе у Алеї писательох.
Новосадски парох о. Юлияна Рац служел панахиду за покойних, а сослужовал дзияк Йовген Надь.
Дружтво Михайлови Мункачийови, котри ше як член Церковного одбору нашей церкви у Новим Садзе останї роки стара о ушоройваню желєнїдла коло гроба о. Йована Храниловича, придало Подзекованє, а Припознанє придате и парохови о. Юлиянови Рацови.
Днї Миколи М. Кочиша отримани з финансийну потримовку Поокраїнского секретарияту за културу, явне информованє и одношеня з вирскима заєднїцами и Националного совиту Руснацох.
